টেট চাংয়েংদা মায়পাক্লবা কেন্দিদেটশিং মশাগী চহী ৪৫ ফাওবা ইন্টরভিউ ফম্বা য়াবগী অয়াবা পীখ্রে।

লক্ষীপুর (কাছাড়), ১৯ ফেব্রুৱারী, ২০১২- টেট চাংয়েংদা মায়পাক্লবা কেন্দিদেটশিংগী কন্ট্রেকচুয়েলদা ওজা লৌবগী চহীগী মতাংদা চহী ৩৮ ফাওবা ওইরম্বদু অমুক মখা তানা এদভারটাইজমেন্ট অমা থোক্তুনা মশাগী চহী ৪৫ ফাওবা ইন্টরভিউ ফম্বা য়াবগী অয়াবা পীখ্রে। অসিতা নত্তনা এল পী গীদমক মহৈগী থাক হায়ার সেকেন্দরীদা চাদা ৫০ ফংবা অমসুং এসসি/এসটি/ওবিসি কেন্দিদেতশিংগী ওইনা চাদা ৫ কোমথোকপা অদুগী মথক্তা নৌনা শেমদোরকপা এদভারটাইজমেন্ট অদুগী মতুং ইন্না টেট পাশ তৌবগা লোয়ননা গ্রেজুয়েত দিগ্রী পায়রবা কেন্দিদেটশিংসু এল পীদা ইন্টরভিউ ফম্বা য়ারগনি। পনবা য়াই, টেট চাংয়েংগী মমাংদা কেন্দিদেটশিংদা অকক্ননা থমলমদবা মহৈগী থাক অমসুং চহী মতাং অদু নৌহৌননা ইন্টরভিউ ফমবগী মাংওইননা সারবা শিক্ষা অভিয়াননা থোকপা চেরোলদা অকক্নবা মহৈগী থাক পীরকপা অমসুং এস সি অমসুং এস টিগী চহী ৫ কোমথোক্লগা ওবিসি কাংলুপগী চহী ৩ কোমথোকফম কোমথোরকতবগী মতাংদা মায়গৈ মায়গৈদগী পেন্দবা ফোংদোক্নবা লোয়ননা রাজ্যগী মহৈমশিংগী মন্ত্রী শ্রী হিমন্ট বিশ্ব শর্মাগী মফমদা মহাক্কী ফেসবুক অমসুং টুইটারগী একান্টতা পেন্দবা ফোঙদোকখি।

সরবা শিক্ষা অভিয়াননা থোকপা চেরোল অমগী মতুং ইন্না রাজ্য অসিগী হন্দক টেট চাংয়েংদা মায়পাক্লকলবা কেন্দিদেটশিংগী দমক কনট্রেকচুয়েলদা ওজা লৌনবগী ফেব্রুৱারীগী তাং ১৪ দা থোকখিবা এদভারটাইজমেন্ট অমদা চহী মতাং ৩৮ ফাওবা ইন্টরভিউ ফম্বা য়াবগী ৱাফম অমসুং এল পী গী মহৈগী থাকতা হায়ার সেকেন্দরীদা চাদা ৫০ ফংবা অদুগা  এসসি/এসটি/ওবিসি কেন্দিদেতশিংগী ওইনা চাদা ৫ কোমথোকপগী ৱাতমক য়াওখি।

অদুবু ফেব্রুৱারীগী তাং ১৭ তা সরবা শিক্ষা অভিয়াননা না অমুক হন্না খরা শেমদোক-শেমজিন তৌরগা থোরকপা চেরোল অমনা মশাগী চহী ৪৫ ফাওবানা ইন্টরভিউ ফম্বা য়াবা অমসুং এল পী গীদমক হায়ার সেকেন্দরীদা চাদা ৫০ ফংদ্রবসু শকখংলবা ইউনিভাসিটি অমদগী গ্রেজুয়েত দিগ্রী পাস তৌরবদি ইন্টরভিউ ফম্বা য়াবগী অয়াবা পীরকখি।

অদুম ওইনমক এম ই গী মতাংদা মহৈগী থাক সাইন্স কেন্দিদেটসিংগী ওইনা সাইন্সতা টেট পাশ তৌবগা লোয়ননা শকখঙলবা ইউনিভারসিটি অমদগী গ্রেজুয়েট দিগ্রী লৌরকপা ওইগদবনি।  অদুগা সোসিয়েল সাইন্স কেন্দিদেটসিংগী ওইনা সোসিয়েল-সাইন্সতা টেট পাশ তৌবগা লোয়ননা শকখঙলবা ইউনিভারসিটি অমদগী গ্রেজুয়েট দিগ্রী লৌরকপা ওইগদবনি। বি-এদ দিগ্রী পায়বা নত্রগা চহী ২গী ইলিমেন্টরী ইজুকেসনগী দিপ্লোমা পায়বা মীওইশিংদা হেন্না খুদোংচাবা পীগনি।

মসিগী দমক অসামদা অহানবা ওইনা পাঙথোক্কদবা ওনলাইনদা ফোর্ম মেনশিনবগী থবক হয়েং তাং ২০ দগী হৌরগা ফেব্রুৱারীগী তাং ২৭ ফাওবা ওনলাইনদা এপ্লিকেসন ফোর্ম মেনশিনবা য়াগনি। সারবা শিক্ষা অভিয়ানগী ৱেবসাইট এস-এস-এ-আসাম-দোট-গোভ-দোট-ইন নত্রগা

টেটকী ৱেবসাইট টেট-আসাম-দোত-কোমদা চঙলগা ওনলাইনদা ফোর্ম সাবমিট তৌবা য়াগনি। সাবমিট তৌরবা মতুংদা ফোর্ম অসি এ-ফোর সাইজগী চে অমদা নমথোক্কনি। নমথোক্লবা চে অসিদা য়াওবা কেন্দিদেটকী সহি তৌফমদা সহি তৌরগা, এটেস্টেত তৌরবা সার্তিফিকেট, মার্কসিট অমসুং টেট সার্তিফিকেটনচিংবা দোকুমেন্টশিং ইন্টরভিউ বোর্দতা পীশিনগনি।  ইন্টরভিউগী মতমনা কাছার জিলাগী মফম মফমদা মার্চ থাগী তাং ১০ দগী হৌরগা ১৪ ফাওবা চৎথগনি।

হন্দক কনট্রেকচুয়েলদা ওজা লিশিং ২৮গা ২২৪ লৌগদৌরিবা অসিগী মনুংদা কাছার জিলাদগী এল পী অমসুং এম ই পুল্লগা ওজা লিশিং ১গা চামপন-কুননিথোই থবক লৌগনি। মসিগী মনুংদা এল পিগী ওজা লিশিং ১ চামরি-হুম্ফুতরা-তরুক অমসুং এম ই গী ওজা ১২৪ য়াওরি।

মসিগী মতুংদা লাক্লিবা মার্চ থাদা পারমানেন্ট ওজা লৌবগী এদভারটাইজমেন্ট অমুক থোক্কনি হায়রি। (লক্ষীপুর-ওনলাইন)