brong brong souriba Yoga Guru Ramdev ki khongjang

নিউ দিল্লিগী রামলিলা মৈদানগী যোগ কেম্পতা যোগা গুরু বাবা রামদেবনা মতম কক্তনা চারা হেনবগী খোঙজং চৎথনবা থৌরাং তৌরম্বা অদুগী ঙরাং নোংয়াই মতুংদা সরকারনা থীংজিনখ্রে। পুলিস কাংবু অমনা রামলিলা লম্পাক্তা চঙলক্তুনা রামদেবকী খোঙজংদা শৌগৎপা মীওইশিংবু তানখাইখি। রামদেবপু দিল্লি পুলিসনা দিল্লি সহরদগী থোকখিনবা য়াথং পীখি ।
রামদেবপু শৌগৎপা কাঙবুগা পুলিসকাংবুগা ঙরাং নুংনা থাবগী থৌদোকতা মীওই ১০০ রোম অশোক অপন নংখি। অশোকপসিং অদু লোক নায়াক জয় প্রকাস হোসপিটালদা লায়কন্নখি। থৌদোক অদুবু নমথনবা হোৎনবদা পুলিসনা টিয়ার গেস কাপখি। তুংদা রামলিলা মৈদানদা সিআরপিসিগী ধারা ১৪৪ থমজিনবগা লোয়ননা মফম অদুদা মী পুনবদা অথীংবা পীখি।
অহিং পুং ২ মখায় তাবদা বাবা রামদেবপু দেপুটি কমিসনার য়াওনা লাকখিবা পুলিস কাংবু অমনা পুথোকখি। গৃহ মন্ত্রী জি কে পিল্লাইনা এ আই এন এস তা ফোঙদোকপা মতুং ইন্না রামদেবপু উত্তরখন্দগী হরিদ্বারদা লৈবা মহাক্কী আশ্রমদা পুথোকখ্রে । রামলিলাগী লম্পাক অসি রামদেবকী যোগ কেম্প তৌবখক্তগী অয়াবা পীবনি হায়রি। হরিদ্বারদা থুংলবা তুংদা রামদেবনা মহাক্কী মহৌশানা শেৎপা লৈঙাং মচুগী ফিজোল অদুগী মহুত্তা অঙৌবা মচুগী ফুরিৎ অমা লিৎলগা পাউমীশিংগী মমাংদা ঙরাং থোকখিবা থৌদোকতুগী মতাংদা পেন্দবা ফোংদোকখি। মহাক্না হায়খি কংগ্রেসনা লুচিংবা সরকার অসিনা মহাকপু হিংনা থম্বা পামদ্রে, ঐহাক্না হিংদুনা লৈরবদি মখোয়গী অমোৎপাশিং অদু মপান থোক্লক্কনি হায়না মখোয়না কিরে হায়খি। থৌদোক অদুবু মহাক্না মতম অমগী জেনরেল দায়রগী য়াথংনা জালিয়ান ৱালা বাগকী থৌদোক থোকখিবা অমসুং ইমারজেন্সী লাউথোকপগুম্বগা পান্দম্নখি।
পনবা য়াই, ঙরাংগী থৌদোক অদুগী মতুংদা রামদেবপু মখা তানা নুমিৎ ১৫ নি চুপ্না দিল্লিদা চঙবদা অথিংবা থমখ্রে। স্বামী রামদেবকী অশেংবা মমীং রামকৃষ্ণ যাদব কৌই। মহাক হরিয়ানাগী মহেন্দ্রনগর জিলাগী আলি সয়দপুর হায়বা খুঙ্গংদা পোকখি।
বিজেপীগী লুচিংবা অরুন জেতলীনা ঙরাংগী থৌদোক অদু ভারতকী পুৱারীদা ইকাইনিঙাই ওইবা মতাং অমনি হায়খি। অসোমদা উত্তরপ্রদেসকী মুখ্যমন্ত্রী ময়াবতীনসু থৌদোক অদুগী অচুম অরাল সুপ্রীম কোর্টনা থিজিনহন্নবা ফোঙদোকখি।
ঙসি অয়ুক পুং ৫ রোম তাবদদি রামলিলা মৈদান মী পুমতাক তাকখি। অসোমদা য়ানবা পুরকলবসু সরকারদগী অইবা চেরোল ওইনা ফংদ্রি ফাওবা মহাক্কী খোঙজং মখা চৎথখিগনি হায়খিবা বাবা রামদেব অহিং অথেংবদা সরকারগী মাইগৈদগী অইবা চেরোল ফংলবা ফাওবদা মহাক্কী খোঙজং লোয়শিনবগী ৱাফম লৈত্রি।
যোগগুরু বাবা রামদেবকা ৱারী শান্নরবা তুংদা পাউমীশিংদা ৱা ঙাংবদা হিউমেন রিসোর্স দিবলপমেন্ট মন্ত্রী কপিল সিব্বলনা হায় মীরৈবাক্কী বেঙ্কশিংদা থমলিবা ব্লেক মনিগী সমস্যা থেংননবা আইন অমা শেম্নবা কমিতি অমা লীংলিবদু পান্দম অসিগীদমক্তনি হায়খি। মরাল লৈরবা শিংবু চৈরাক পীবতা নত্তনা ব্লেক মনি পুম্নমক সরকারনা জাতীগী লননি হায়না লাউথোক্নবা সরকারগী ফিরেপ লৈ হায়খি।
অদুম ওইনমক ব্লেক মনিগী মতাংদা ওর্দিনেন্স অমা শেম্বগী ৱাফমদি লৈতে হায়রি। হুরান-লান্নাগী শেনফমশিং অসি ভারত্তগী পুথোকখিবগী লম্বী থীজিনগনি হায়না মহাক্না মখা তাখি। মরকসিদা কংগ্রেসনা বাবা রামদেবপু বি জে পী অমসুং আর এস এস অমসুং মখোয়গী লোয়নবা লুপশিংনা শিজিন্নবা মীশকনি হায়না মরাল শিরি।
অসোমদা কংগ্রেসকী জেনরেল সেক্রেটরী দীগবিজয় সিংনা মহাক্কী মথক্তা ঙাংলি- শকলিবশিংগী মতাংদা পাউখুম ওইনা মহাক্না চহী ২০ মীয়ামগী সেবা তৌরকপসিদা মীয়ামনা নুংশিদুনা দোনেসন তৌরকপদু ঐগী তৌজমলগী মহৈনি, মসিদি ব্লেক মনি কৌবা য়াদে হায়না মহাক্না হায়খি।
ঙরাংগী থৌদোকতুগী মতাংদা রাস্ট্রীয়া জনতা দল (আর জে দি) গী প্রেসিদেন্ট লালু প্রসাদ য়াদবনা রামদেব অমসুং অন্না হাজারেনা চৎথরিবা শেনজা থুমজাগী মতাংদা হন্দক্তা চৎথরিবা খোঙজং অসিদি চহী কয়ামরুমগী মমাংদা মখোয়গী ওর্গেনাইজেসননা চৎথখ্রবনি হায়না ফোঙদোকখি। (লক্ষীপুর ওন-লাইন - 5/6/2011)

Post a Comment

0 Comments