ঙসি

লক্ষীপুর মহকুমাগী লম্বী থোং ফৎচিল্লক্তবা অমদি অতৈ অতৈ হীরম কয়াদা খন্নখ্রে।

লক্ষীপুর (কাছার), জুন, ১৯, ২০১১ ইং - লক্ষীপুর সিনিয়র সিটিজেন্স ফোরামগী মীফম অমা ঙরাং থাংজা নুমিৎতা খোরিরোল কম্যুনিটি হোল, লক্ষীপুরদা লূপকী সভাপতি ঙারিয়াম্বম গৌরচন্দ্রনা মীফম মপু ওইদুনা পাঙথোকখ্রে। মীফমদা লূপকী ওইবা ৱাফম কয়া খন্নবগা লোয়ননা লক্ষীপুর মহকুমাগী লম্বী থোং ফৎচিল্লক্তবা অমদি ফুলেরতলগী বরাক তুরেলগী থোং য়ারিবমখৈ খোংজেল য়াংনা লোয়শনবিনবা, লক্ষীপুর-ফুলেরতল লম্বী অমসুং লক্ষীপুর-শিবপুর সহিদ নন্দচান্দ লম্বী, লোয়ননা সিঙ্গেরবন্দগী লৈরায় নীংখায়বা থিংবগী থবক পায়খৎপিনবা মরী লৈনবা মীওইশিংদা ৱাকৎপা হায়না লেপ্নখি।
অথুবা মতমগী মনুংদা লূপসিগী সভাপতি ঙারিয়াম্বম গৌরচন্দ্র অমসুং জেনরেল সেক্রেটরী থোকচোম কৃষ্ণমোহননা লুচিংবা মীহুৎ কাঙবু অমা দিসপুর চৎননবা অমসুং দিসপুরদা আসামগী গভর্নর, মুখ্যমন্ত্রী উন্নদুনা লুপকী ৱাকৎ খরাগী মতাংদা খন্নরুনবা ৱারেপ্নখি।
মীফমদা লূপকী ৱাকৎশিংগী মরমদা পল্লদুনা ভাইস প্রেসিদেন্ট লাইতোঞ্জম মনিধন, ইঙুদম বিনোদ, ঙাংবম নয়নবাবু, হাজারিময়ুম নন্দমোহন শর্মা, ঙাঙোম রাজেন্দ্র, থেঙুজম সাবিত্রি দেবী নচিংবা মীওইশিংনা ৱা ঙাংখি।
মীফমদা ৱাকৎ কয়াগা লোয়ননা লক্ষীপুরগী এস দি ও (সিভিল) গী অফিসতা তং-তাবা পার্মানেন্ট এস দি ও অমসুং ই এ সি মপুং ফানা থম্বীনবগী মরমদা খন্নখি। ৱাফমশিং অসিগী দমক ৱাকৎ খোংজং চৎথনবসু খন্নখি হায়রি। (লক্ষীপুর-ওনলাইন)