ঙসি

ইপুথৌ থোংনাং থৌগল্লুপকী চহীগী মীফম ইপুথৌ লাইবুংদা পাঙথোকখ্রে।

লক্ষীপুর, মার্চ ৬, ২০১১ - ইপুথৌ থোংনাং থৌগল্লুপকী চহীগী মীফম ঙসি অয়ুক পুং ৯ তাবদা ইপুথৌ লাইবুংদা লূপকী প্রেসিদেন্ট অরাম্বম গৌরগোপালনা মীফম মপু ওইদুনা পাঙথোকখ্রে।
মীফমদা হৌনবী মতুং ইন্না সেক্রেটরীনা চহীগী পাউদম অমদি চাগা চাদিং পাথোকতুনা তাহনখি। অমসুং মীয়ামনা অমত্তা ওইনা য়ারে হায়না লৌখিবগা লোয়ননা মীফম মপুনা ইং ২০১১-২০১৩গী ওইনা অনৌবা কমিটি অমা শেম্নবা মীয়ামদা শিন্নখি।
মতুংদা মাইমোম বন্ধু সিংহবু রিটার্নিং ওফিসার হাপতুনা ইপুথৌ থোংনাং থৌগল্লুপকী ইং ২০১১-২০১৩গী ওইনা অনৌবা থৌশিল কাংলুপ অমা শেমখি।
থোকচোম বীরমোহন অমসুং পোৎশম্বম ইবুঙোমচাবু লাইশেলুংবা, লৈশুংবম রোবিন্দ্রবু প্রেসিদেন্ট, নিংথৌখোংজম রাজেশ্বরবু ভাইস প্রেসিদেন্ট, অরাম্বম প্রদীপপু সেক্রেটরী, ইঙুদম সোপোনবু এসিস্টেন্ট সেক্রেটরী, অমসুং লোংজম গোপেন্দ্রবু কেসিয়ার ওইনা খনখি। মীফমনা মীওই ১২ খকপু থৌগল্লুপ অসিগী মেম্বর ওইনা খনখি। মেম্বরশিং অদুদি – ইঙুদম শ্যামাকান্ত, ইঙুদম রমাকান্ত, ইঙুদম রোমেন, পোৎশম্বম বিমল, পোৎশম্বম ধীরেন, ঙারিয়াম্বম অশ্বিনিকুমার, কব্রবম বিমল, কোঞ্জেংবম নির্মল, সৱাইজম নন্দকুমার, ৱাহেংবম ভুবনেশ্বর, কৈথেল্লাকপম সানৌতোন অমসুং লাইরেঞ্জম মুক্তা সিংহনি।
কো-ওপটেত মেম্বর মরি অমসু থৌশিল্লুপনা মথংগী মীফমদা খনগনি হায়রি।
মীফমনা লমদমসিগী অহল নিপানবু পাউতাকলোই (এদভাইজর ) ওইনা খনখি। মখোয়শিংদুদি- লৈশুংবম বামচা, সালাম তরনী, ইঙুদম বিনোদ, ৱাংখেম শরৎচন্দ্র, অরাম্বম গৌরগোপাল, হাওরোংবম বিশ্বনাথ, মাইমোম বন্ধু অমসুং ইঙুদম জীতেন্দ্র মখোয়শিং অসিনি।
মীওই ৬ পু মীফমনা স্পীসিয়েল ইনবাইতীজ ওইনা খনখি। মখোয়শিংদুদি- পোৎশম্বম সুনামনি – ইম্ফাল, পোৎশম্বম অক্ষয়কুমার – চপ্রৌ, রাজকুমার সনাহল – শ্রীবার, দাক্তর খাইদেম নন্দবাবু – লক্ষীপুর, থোকচোম বিশ্বনাথ – মুতুম লৈকায়নি।
খন্ন-নৈরবা মতুংদা হৌখিবা চহীগী ৱারেপশিং য়াওনা অনৌবা ৱারেপ খরসু ঙসিগী মীফমনা লৌখি। মদুদি – ইপুথৌগী হৌজিক লৈরিবা লাইশঙ অসিগী মহুত্তা অনৌবা লাইশঙ অমা শানবগী দমক্তা ইপুথৌ ইবেন্থৌ অনিবু মতম খরা হোংদোক্তুনা লৈনবগী থৌরম অমা হয়েং মার্চকী তাং ৭ নিংথৌকাবা নুমিৎ অয়ুক্তা পাঙথোকপা। হায়রিবা হোংদোকপগী থৌরমসিদা লমদমসিগী মীয়ামনা শরুক য়াবিরনবা নৌনা খল্লবা লূপকী সেক্রেটরী অরাম্বম প্রদীপনা ফোংদোরকখি হায়রি।
মীখল মতম ওইবনা শজিবু লাইথোং হাংবগী থৌরম এপ্রিলগী তাং ৮ দা ওইনা পাঙথোকপা হায়নসু মীফমনা লেপ্নখি। অতৈ ৱারেপশিংদি ইপুথৌগী লাইবুং অমদি লমগী পাট্টা তাননবা হোৎনবগা লোয়ননা লাইশঙ অমদি মাইবী লোয়শঙগী অৱাংদা হৌরিবা য়ুবী পাম্বীশিংবু য়ান্থোকপীনবা অরোইবা ওইনা হায়জ চেরোল অমা চবুংবম শ্রী হেমন্ত সিংহদা পীশিনবা হায়বা ৱাফমসু য়াওরি।
মীফমগী অরোইবদা ইপুথৌগী লাইবুংদা অরিবা অমদি অনৌবা থৌগল্লূপকী থৌবুরোইশিংনা মখোয় মখোয়গী থৌদাং শিন্নবগী থৌরম অমসু পাঙথোকখি ।