ঙসি

পদ্মশ্রী নিংথৌখোংজম খেলচন্দ্রগী মফমদা ইকাই খুম্নজবা থৌরম অমা খোরিরোল কমিউনিতি হোল লখিপুরদা পাঙথোকখ্রে|

লখিপুর, ১৩ ফেব্রুৱারী ২০১১ : নহারোল খোরিরোল সিল্লুপ আসাম অমসুং মনিপুরি সাহিত্য পরিষদ আসামগী লখিপুর জেলা সমিতিনা সিন্দুনা ঙরাং ফেব্রুবারী তাং ১২ থাংজা নুমিত অয়ুক পুং ১০ তাবদা হন্দক্তা লৈখিদ্রবা মনিপুরি সাহিত্য পরিষদ ইম্ফালগী হান্নগী সভাপতি সক্নাইরবা অইবা পণ্ডিত গবেষক অমসুং পদ্মশ্রী নিংথৌখোংজম খেলচন্দ্রগী শ্রাদ্ধ নুমিত্তা মাগী মফমদা ইকাই খুম্নজবা থৌরম অমা খোরিরোল কমিউনিতি হোল লখিপুরদা ইঙুদম বিনোদনা থৌরম মপু ওইদুনা পাঙথোকখ্রে| লোয়ননা কাছারগী বাম মালুগ্রামদা লৈবা মনিপুরী নট সংকীর্ত্তনগী অখন্নবা সৈসকপা সংগীত রত্ন মোইরাংথেম বাবাতোম্বী সিংহনা লৈখিদবগী অৱাবা ফোঙদোকপগী থৌরম অমসু পাঙথোকখি| মিনিত ২ তুমিন্না লেপতুনা লৈখিদ্রবা অহল অনীগী থৱায়না লাইরমলেনদা ঈংনা লৈহনবিনবা তাইবঙ মপুদা নিজখি| অহল অনিসিগী পুন্সিগী মরমদা সিল্লুপকী জেনরেল সেক্রেটরী লোংজম গোপেন্দ্র অমসুং থোকচোম বিশ্বনাথনা ৱা ঙাংখি|