ভারতকী "মিসন শক্তি" গী এন্টি সেটেলাইট (এসেট) মিসাইল চাংয়েংদা নাসা না মীপাইবা।

লখিপুরওনলাইন দিজিটেল দেস্কঃ ভারতনা মশাগী মিসাইল থাগৎতুনা নেম্না পাইরিবা কান্নদ্রবা সেটেলাইট কাপথবগী চাংয়েং তৌরিবা অসিগী মতাংদা ইন্টরনেসনেল স্পেস স্টেসন (আই এস এস) দা অমাং অতা থোরকপা য়াই হায়না নাসানা চীংনবা ফোঙদোকখ্রে। ভারতনা হন্দকতা চৎথখিবা চাংয়েং অসিনা লাকলিবা নুমিৎ ১০ নি রোম অসিদা আইএসএস গী চাদা ৪৪ রোম অমাং অতা থোকহল্লবা য়াই হায়না ইউনাইটেদ স্তেটকী এরোনোটিক্স এন্দ স্পেস এদমিনিস্ট্রেসন (নাসা) না নুংনাংবা ফোঙদোকখিবনি। ভারতকী "মিসন শক্তি" গী এন্টি সেটেলাইট (এসেট) মিসাইল অসিনা পৃথিবীদগী কিলোমিটর ৩০০ রোম ৱাংনা পাইরিবা সেটেলাইট কাপথখি অমসুং মসিগী চাওরাক্না কিলোমিটর ৭০ মথক্তা পৃথিবীদগী কিলোমিটর ৩৭০ রোম ৱাংনা ইন্টরনেসনেল স্পেস স্টেসন (আই এস এস)  পাইদুনা লৈরি।
ইন্টরনেসনেল স্পেস স্টেসন (আই এস এস) গী থৌবুরিবা জিম ব্রিডেনস্টিন গী মতুং ইন্না থৌদোক অসিনা আইএসএস কী খুদোং থিনিঙাইনি হায়খি। "এসেট" মিসাইলগী মতেংনা পৃথিবীদগী কিলোমিটর ৩০০ ৱাংনা পাইরিবা ভারতগী সেটেলাইটকী মচেৎ মকায় ৪০০ রোম চায়খায়দুনা লৈখ্রে। হৌজিক পাইদুনা চৎলিবা মচেৎ মকায়শিং অদুগী খোংজেল অসিদা মসিনা কদায়দা করম্বা মতমদা থোমজিল্লুগদবা হায়বা তম্বা ঙমদে। মচেৎশিং অদুগী মনুংদা সেন্টিমিটর ১০দগী হেন্না চাউবা খরমখৈদি ট্রেক্ তৌবা ঙমলি। অমসুং মচেৎ ২৪ রোমদি মখোয়না পাইদুনা চৎলিবা খোঙচৎ লম্বীগী মথকলোমদা চৎখৎখিবগী খুদম ফংলি হায়না নাসানা পাউদমলি।
চৎখৎখ্রিবা মচেৎ মকায় ২৪ অদুগী মনুংদগী অমা অনিনা ইন্টরনেসনেল স্পেস স্টেসন (আই এস এস) তা থেঙ্গায়বা তারবদি স্টেসন অসিতা নত্তনা মসিগী মনুংদা হৌজিক থবক শুরিবা মীওইশিংদসু কিনিঙাই ওই হায়বসিনি। ভারতকী এসেট চাংয়েং অসিনা থোকহনখিবা মচেৎশিং অদুগী মনুংদা খ্বাইদগী চাউবা মচেৎশিং ট্রেক তৌবগী থবক চৎথরি।
পনবা য়াই, শুন্দ্রংগী তোঙান তোঙানবা মফমশিংদা পৃথিবীগী অকোয়বদা হৌজিক পাইরিবা মচেৎ মকায়শিংগী মনুংদা সেন্টিমিটর ১০ রোম রেদিয়াস ওইবা মচেৎশিংগী মশিং ২৩,০০০ নি। মসিগী মনুংদা খৃঃকুমজা ২০০৭ তা চাইনাগী এন্টি সেটেলাইট চাংয়েং অমা পাঙথোকখিবা মতমদা চাওরাক্না সেটেলাইটকী মচেৎ মকায় ৩০০০ রোম শুন্দ্রংদা চাইথোকতুনা লৈহৌখিবনি।

পাউশিং অসিগা লোয়ননা অতৈ পাউগী দমক গুগল্ প্লে স্টোরদগী ইন্সটোল তৌবিউ Lakhipuronline android app

--Please Like & Subscribe : 
YouTube https://www.youtube.com/c/Lakhipuronline
Facebook https://www.facebook.com/c/Lakhipuronline