Lakhipuronline | Complete platform for North-east India

First regional News blog of North East India, breaking news in English and Manipuri. Updates about Barak Valley...

  || BREAKING NEWS ||   #### ###

September 25, 2018

সাইখোম মিরাবাই চনু অমসুং বিরাট কোহলিদা রাজিব গান্ধী খেল রত্ন এৱার্দ ২০১৮ পীখ্রে

প্রেসিদেন্ট রামনাথ কোবিন্দ না সাইখোম মিরাবাই চনুদা রাজিব গান্ধী খেল রত্ন মনা ২০১৮ খুৎশিন্নবা
ৱেটলিফ্টর সাইখোম মিরাবাই চনু অমসুং ভারতকী নুপাগী ক্রিকেট তীম কেপ্তেন বিরাট কোহলিদা সেপ্তেম্বরগী তাং ২৫ লৈবাকপোকপা নুমিত্তা রাজিব গান্ধী খেল রত্ন এৱার্দ পীদুনা ইকায় খুম্নখ্রে। রাস্ট্রপতি ভৱনদা পাঙথোকখিবা চহীগী ওইবা নেসনেল স্পোর্টস এৱার্দ পীবগী থৌরমদা ভারতকী প্রেসিদেন্ট রামনাথ কোবিন্দনা মনা অসি খুৎশিন্নখি। 


শান্ন-খোৎনবদা পীবা ভারতকী খ্বাইদগী ৱাংলবা মনা অসি ফংবদা সাইখোম মিরাবাইনা মহাক্কী টুইটরদা পীবা পাউজেলদা নুমিৎ অসি মহাক্কী খ্বাইদগী নুঙাইরবা নুমিৎনি হায়না পল্লদুনা মহাক্কী শান্নবগী খোঙচৎ অসি য়ৌনবা হোৎনবদা মতেং পীরকখিবা ইমুং মনুং, কোচ নচিংবদা হরাও নুঙাইবা ফোঙদোকখি।


ৱেটলিফ্টিং মশান্নদা কর্নম মলেশ্বরী (১৯৯৫) অমসুং নামৈরাকপম কুঞ্জরানী (১৯৯৬) কী মতুংদা মনা অসি ফংবা সাইখোম মিরাবাইনা অহুমশুবনি। মমাংগী চহীদা পদ্মশ্রী ফংখিবী মিরাবাই চনু হৌখিবা চহীদা কেজি ৪৮গী কেটাগোরীদা ৱার্লদ ৱেটলিফ্টং চেম্পিয়নসিপতা সনাগী মেদল ফংখিবগা লোয়ননা মহাকপু খেল রত্ন পীনবা খনগৎখি।
পনবা য়াই খেল রত্ন এৱার্দ ফংলবশিংদা শেলগী মনা লুপা লাখ ৭.৫ অমসুং অর্জুন এৱার্দ ফংলবশিংদা শেলগী মনা লুপা লাখ ৫ গা লোয়ননা সাইতেসন অমগা পীরি।
রাজিব গান্ধী খেল রত্ন এৱার্দ ২০১৮ ফংলবা সাইখোম মিরাবাই চনু অমসুং বিরাট কোহলি
অসোমদা, সচীন তেন্দুলকর (১৯৯৭) অমসুং এমএস ধোনী (২০০৭) কী মতুংদা ক্রিকেটর অমদা পীবা মনা অসি বিরাট কোহলিনা অহুমশুবনি। 

নুমিৎসিগী থৌরমদা শান্নরোই ২০দসু অর্জুন এৱার্দ পীদুনা ইকায় খুম্নখি। প্রেসিদেন্টনা থৌরমসিদা তেনজিং নোর্গে নেসনেল এদভেন্চর এৱার্দ, মৌলানা অবুল কালাম আজাদ ট্রোফি অমসুং রাস্ট্রিয়া খেল প্রোটসাহন পুরস্কারসু পিখি।

প্রেসিদেন্টনা দ্রোনাচার্য্য অমসুং ধ্যানচান্দ এৱার্দসু শান্নরোইশিং অসিবু তম্বী তাকপীরকখিবা কোচশিংদা খুৎশিন্নখি।
তশেংনদি স্পোর্টস্ এৱার্দ পীবগী থৌরম অসি চহী খুদিংগী ওইনা মেজোর ধ্যানচান্দগী মপোক নুমিৎ আগস্টকী তাং ২৯দা পাঙথোকপনি অদুবু হন্দক্কী চহি অসিদা জকার্টা-পালেম্বাং এসিয়ান গেমস না মরম ওইরদুনা থৌরম অসি য়ৈথরকখিবনি।
মনা ফংলবা শান্নরোইশিং-

রাজিব গান্ধী খেল রত্ন – সাইখোম মিরাবাই চনু, বিরাট কোহলি

অর্জুন এৱার্দ – নীরজ চোপ্রা (এথলেটিক্স), জিনসন জোন্সন (এথলেটিক্স), হিমা দাস (এথলেটিক্স), এন সিক্কি রেদ্দি (বেদমিন্টন), সতীস কুমার (বোক্সিং), স্মৃতি মান্ধনা (ক্রিকেট), শুভঙ্কর শর্মা (গোল্ফ), মনপ্রীত সিং (হোকি), সবিতা (হোকি), কর্ণেল রবি রাথোর (পোলো), রাহী সর্নোবট (সুটিং), অঙ্কুট মিত্তল (সুটিং), স্রেয়সী সিং (সুটিং), মনিকা বত্রা (তেবল তেনিস), জি সাথিয়ান (তেবল তেনিস), রোহন বোপন্না (তেনিস), সুমিত (রেসলিং), পুজা কাদিয়ান (ৱুসু), অঙ্কুর ধামা (পারা-এথলেটিক্স), মনোজ সরকার (পারা-বেদমিন্টন)।

দ্রোণাচার্য্য এৱার্দ – আসায়া কুট্টাপ্পা (বোক্সিং), বিজয় শর্মা (ৱেটলিফ্টিং), এ শ্রিনিবাসা রাও (তেবল তেনিস), সুখদেব সিং পননু (এথলেটিক্স), ক্লারেন্স লোবো (হোকি লাইফ টাইম এচিভমেন্ট), তরক সিনহা (ক্রিকেট লাইফ টাইম এচিভমেন্ট), জিবন কুমার শর্মা (জুদো লাইফ টাইম এচিভমেন্ট), ভিআর বিদু (এথলেটিক্স লাইফ টাইম এচিভমেন্ট)।

ধ্যান চান্দ এৱার্দ – সত্যাদেব প্রসাদ (অর্চরি), ভারত কুমার শেত্রী (হোকি), বোবি অলোইসিয়াস (এথলেটিক্স), সি দাদু দাত্তরে (রেসলিং)।

Pao sing asi ga loinana atei e-pao gi damak
Lakhipuronline android app install toubiyu CLICK HERE

No comments:

Post a Comment

Comments ...