বরাক তম্পাক্কী খোমজিনবা পাউ ২৮-০৭-২০১৮

বরাক তম্পাক্কী

খোমজিনবা পাউ

২৮-০৭-২০১৮

জিরিবামদা থোকখিবা ইরাংদা পুলিস য়াওনা মীওই তরেৎ অশোক অপন নংখ্রে।

⧭⧪➤  ওল জিরিবাম য়ুনাইটেদ মাইনোরিটি পিপলস্ না ঙরাং জিরিবামগী লালপানিদা মনিপুর পিপলস্ প্রোটেক্সন বিলগী মায়োক্তা চৎথখিবা খোঙজংগা মরী লৈননা পুলিসকা মুক্নবগী থৌদোক্তা জিরিবাম এসপি য়াওনা মীওই তরেৎ অশোক অপন নংখ্রে। আন্দোলন তৌরিবশিংনা পুলিস তমনা নুঙনা থাবা হৌরকপদগী থৌদোক অদুবু নমথনবা হোৎনবদা পুলিসনা টিয়ার গেস, রাবার বুলেট অমসুং শুন্দ্রংদা নোংমৈ কাপখি। খোঙজং চংশিল্লিবশিংগী মরক্তগী মীওই মরী শোকখি, হেনজিন্না শোকপশিং শিলচর মেদিকেল কোলেজতা লায়কন্নরি। অদুগা থৌদোক অদুদা জিরিবাম এসপি এল মুবি সিংহ, ওসি বঙ্কবিহারি সিংহ য়াওনা অতৈ পুলিস খরসু অশোক অপন নংখি হায়রি। জিরিবামগী দিসি রোবার্ট ক্ষেত্রিময়ুমগী চেরোল মতুং ইন্না জিরিবামদা সিআরপিসিগী ধারা ১৪৪ চৎনহনখ্রে।

পনবা য়াই, হৌখিবা জুলাই ২৩দা মনিপুর বিধান সভাদা মনিপুর পিপলস বিল ২০১৮ পাশ তৌখি। খৃঃ ১৯৫১ দা কাটঅফ চহী ওইরিবা বিল অসিগী মায়োক্তা জিরিবামদা লৈরিবা বেঙ্গলি হিন্দু অমসুং মুসলিমশিং পুল্লগা শেমখিবা ওল জিরিবাম ইউনাইতেদ মাইনোরিতি পিপলস্ হায়না মীংথোনবা বেনরগী মখাদা খোঙজং চংশিনখি। বিল অসিগী মায়োক্তা জুলাইগী তাং ২৫দা লূপ অসিনা পাঙথোকখিবা রেলিগী তুংদা ভারতকী প্রেসিদেন্ট অমসুং মনিপুরগী রাজ্যপালগী মফমদা ৱাকৎ চেরোল থাখি। মেমোরেন্দ অদুদা খৃঃকুমজা ১৯৭২গী জনুৱারী ২১ দতা মনিপুরনা রাজ্য ওইখ্রগা করম্না খৃঃকুমজা ১৯৫১ দা কাটঅফ চহী ওইগদবনো হায়না হংবগা লোয়ননা বিল অসি সাংবিধান অমসুং গণতনত্রগী মায়োক্তা লৈবা বিলনি হায়না পনখি।(www.lakhipuronline.in)

সিঙ্গেরবন্দদা কুইজ অমসুং লাইয়েকপা হেন্দান্নবা পাঙথোক্লগনি।

⧭⧪➤  অল আসাম মনিপুরী স্টুদেন্টস্ য়ুনিয়ন সিঙ্গেরবন্দ দিবিজনেল কমিটিনা শিল্লাংদুনা অপেন স্কুল কুইজ কম্পিটিসন অমসুং দ্রোইং কম্পিটিসন অমা লাক্লিবা জুলাই ২৯ নোংমাইজিং নুমিৎতা শিরোইলিলি রাশমনি ইংলিস স্কুলদা পাঙথোক্লগনি। কুইজকী ওইনদি তীম অমদা মীওই অহুম ওইগদবনি। অহানবা মনা লুপা ১৫০০/- অনিশুবা মনা লুপা ১০০০/- অদুগা অহুমশুবা মনা লুপা ৫০০/-নি। লাইয়েকপা হেন্দান্নবগী ওইনদি ক্লাস ৱানদগী ফাইভ ফাওবা অমা অদুগা ক্লাস সিক্সতগী ঐইট ফাওবা গ্রুপ অমা অসুম্না গ্রুপ অনি থোক্না খাইদোকলি। অকুপ্পা মরোলগী দমক আমসু সিঙ্গেরবন্দ দিবিজনগা পাউ ফাওননবা হায়রি।(www.lakhipuronline.in)

এনআরসি গী ফাইনেল দ্রাফ্ট ফোঙদোকপগা মরী লৈননা লখিপুরদসু চেকশিন থৌরাং লৌখৎখ্রে।

⧭⧪➤  নেসনেল রেজিস্টার অফ সিটিজেন্স (এনআরসি)গী ফাইনেল দ্রাফ্ট ফোঙদোকপগী মমাং অমসুং মতুংদা লখিপুর মহকুমানা কোনবা মফমশিংদা চেকশিন থৌরাং লৌখৎপগী পান্দমদা লখিপুর মহকুমাগী তোঙান তোঙানবা থানা না কোনবা মফমশিংদা মেজিস্‌ট্রেতশিং থৌ পুহনখ্রে। লখিপুর অমসুং জিরিঘাট থানা না কোনবা মফমদা প্রদীপ কুমার গুপ্ত, বাঁশকান্দিনা কোনবা মফমদা ওয়াহিদুল ইসলাম অমসুং জোয়পুর না কোনবা মফমদা প্রীতম রাজা শর্মাদা থৌ পুহনখ্রে।(www.lakhipuronline.in)

এনআরসিগী মতাংদা কাহেনবা মেসেজ থাবগী মরালদা হাইলাকান্দিদগী অমা ফারে।

⧭⧪➤  এনআরসিগা মরী লৈননা আইন কায়না কাহেনবা ৱাফম খরা ফেসবুকতা ইরুবগীদমক হাইলাকান্দি পুলিসনা আলগাপুরদগী মীওই অমা ফারে। মরু ওইনা ফেসবুক অমসুং ৱাট্সএপতা পুলিসনা কুপ্না য়েংশিনবগী থবক চৎথরি হায়না হাইলাকান্দি জিলাগী পুলিস সুপার শ্রী মিশ্রানা ফোঙদোকলি।(www.lakhipuronline.in)

 Pao sing asi ga loinana atei e-pao gi damak 

Lakhipuronline android app install toubiyu CLICK HERE