বিজ্ঞানগী তাইবঙদগী অরংবা থৱানমিচাক অমা খঙহৌদনা কেনখ্রে।


বিজ্ঞানগী তাইবঙদগী অরংবা থৱানমিচাক অমা খঙহৌদনা কেনখ্রে
মালেমদা শক্নাইরবা থিওরিতিকেল ফিজিসিস্ট স্টিফেন উইলিয়াম হোকিং লৈখিদ্রে। মার্চ ১৪, ২০১৮ য়ুমশাকৈসাগী অয়ুকতা লৈখিদবনি। মশাগী চহি ৭৬ শুখ্রে। এস্ট্রোফিজিসিস্ট অমা ওইনা মমিং লৈরবা থিজিল্লোই অসিগী মশানা ইবা লাইরিক ব্রিফ হিস্ট্রি অফ টাইমখ্বাইদগী মশিং য়াম্না য়োনখিবা লাইরিকশিংগী মনুংদা অমনি। ব্লেকহোল অমসুং রিলেটিভিতিগী মরমদা থিজিনবদনি ব্রিটিশ বিজ্ঞানিক অসিনা মমিং চৎলিবসি

হোকিংগী মচা অহুম রোবার্ট, লুসি অমসুং টিমোথি মখোয়না মপাগী হনবা লৈতবা থৌনাগীদমক চাওথোকচৈ। মশাগী চহী ২১ শুরকপদা মোটোর নিউরোন লায়নানা নাবদগী ডোক্তরনা শুপ্নতগী চহি অনিখক্তমক হিংখিগনি হায়না মতম পিখিবনি অদুবু মহাক হনবা লৈতনা কেমব্রিজতা অদুম্মক মখা তানা অদুম্মক মহৈ তমথখি। লায়না অসিনা মরম ওইরগা মহাক ৱা ঙাংবা ঙমদবতা নত্তনা লেঙবা চৎপা ঙমদবনা হুইল চেয়ারগী মতেংনা চৎথোক চৎশিন তৌখি। ৱা ঙাংবা ঙমদবনা ভোইস সিন্থেসাইজরগী মতেংনা ফোঙদোক্নিংবদু তাইপ তৌদুনা খোঞ্জেলদা ওন্থোকহল্লগা পৃথিবীগী মীয়ামগা পাউ ফাওদোক ফাওজিন তৌখি। হুইল চেয়ারগা লোয়ননা মালেমগী মফম মফমদা চৎতুনা ৱা ঙাংখি। ভারত্তসু লাকলমখি। এলবার্ত আইনস্টাইগী মতুংদা স্টিফেন হোকিংনা মালেমদা খ্বাইদগী মমিং লৈরবা থিওরিতিকেল ফিজিসিস্ট অমা ওইখি। 

স্টিফেন হোকিং জনুৱারীগী তাং ৮, ১৯৪২ইং দা ইংলেন্দগী অক্সফোর্দতা পোকখি। মপাবুং ফ্রাঙ্ক হোকিং জিববিজ্ঞানগী থিজিল্লোই অমনি। মমা ইসাবেল হোকিং রাজনীতিগী কর্মীনি। মপানদি হোকিংবু দোক্তর অমা ওইহন্নিংখিবনি। ফিলিপ্পা অমসুং মেরি হোকিংগী মচননুপীনি। লণ্ডনগী হাইগেটতা লৈবা বাইরোন হাউজ স্কুলদা হোকিং অহানবা স্কুল তম্বা হৌখি। ১৯৫৯ ইং মশাগী চহি ১৭ শুবদা অক্সফোর্ড ইউনিভার্সিতিদা কোলেজ তম্বা হৌখি। কেম্ব্রিজতা গ্রেজুয়েত মহৈরোই ওইরিঙৈ তানজাদা জেনগা ১৯৬৫গী জুলাই ১৪দা লুহোংখি।


নোংম নোংমগী য়ামখৎলক্লিবা মীশিং অমসুং মখোয়গী মথৌতাবা মচাকশিং ফংননবা হোৎনবদা ঐখোয়না লৈরিবা পৃথিবী অসি ঙসিদগী চহী ৬০০ লোমগী  মনুংদা মৈবুন অমগী মতৌগুম তাঙ্গোই ওনখ্রগনিথৌওং অসিবু কনানসু থিংবা ঙমলোই হায়না হোকিংনা ফোংদোক্লমখি মীওইবা জাতিনা তুংকোয়না হিংদুনা লৈনবগী দমকতা অতোপ্পা গ্রহ অমদা চৎহৌবা তঙাইফদে হায়রমখি ঐখোয়গী সৌরজগৎ অসিগী মনাক নক্না লৈরিবা অতোপ্পা সৌরজগৎ আলফা সেনট্যুরি অসিদা ঐখোয়গী লৈফম থিবা তাবনি মসিনা খ্বাইদগী ফবা উপাইনি হায়না বৈজিংদা পাঙথোকখিবা থৌরম অমদা মহাক্না ৱাফমসি ফোংদোক্লদুনা আলফা সেনট্যুরিদা নোনোক্রাফ্ট থাদুনা চাংয়েং চৎথনবা হায়খি

স্টিফেন হোকিং লাই (ইশ্বর) থাজদবা মীশকনি। মহাক্না হায়খি “হৱেন দি ইউনিভার্স হেস্ নো বিগিনিং এন্দ নো এন্দ, হৱাইর ইজ দি রোল অফ গোদ”। লাই থাজদবা স্টিফেনগী থৱাই মীরেল অদু লাইরমলেনগী করম্বা মফমদা লৈরগনি হায়না হায়নবা য়াওদবা নত্তে। স্টিফেন হোকিংগী পুন্সি ৱারীদা য়ুম্ফম ওইবা রোমান্টিক দ্রামা ফিল্ম “দি থিওরী অফ ইভরিথিং” (২০১৪) পুথোকখ্রে। ফিল্ম অসি মহাক্কী নুপী জেন হোকিংনা ইবা “ট্রেভেলিং টু ইনফিনিটিঃ মাই লাইফ উইথ্ স্টিফেন” হায়বা লাইরিক অসিদগী এন্ঠোনি মেককার্তেননা ফিল্ম ওইনা শেমদোকখিবনি। মমিং লৈরবা ইংলিস এক্টর এদি রেদমাইননা স্টিফেন হোকিংগী শক্তম লাংঙি।

অমবু ওইরবসু অমবু ওইরবসু মহাক্কী হোৎনজমল মহৈ অসিনা শক্নাইরবা বিজ্ঞানিক অসিদা ২০১৮-১৯গী নোবেল মনা পীরগনি হায়না নীংফুং নীংফুং ঙাংনবা তানরুরবসু! নোবেল মনা ফংবগী দমক বিজ্ঞানিক অমনা শিখ্রবা মতুংদা পীবা য়াদবগী চৎনবী লৈবনা স্টিফেন হোকিংগী তুংইনবশিংদা নীঙমদবা অমদি সোইদনা লৈহৌরগনি

মহাক্না ফংখিবা মনামথুমশিংগী মনুংদা -
·         অ্যাডামস মনা (১৯৬৬)
·         এডিংটন মেদেল (১৯৭৫)
·         ম্যাক্সওয়েল মনা (১৯৭৬)
·         ড্যানি হাইনম্যান মনা (১৯৭৬)
·         হিউ মেদেল (১৯৭৬)
·         আলবার্ট আইনস্টাইন মেদেল (১৯৭৮)
·         রয়্যাল অ্যাস্ট্রোনমিক্যাল সোসাইটিগী সনাগী মেদেল (১৯৮৫)
·         ডিরাক মনা (১৯৮৭)
·         উলফ মনা (১৯৮৮)
·         প্রিন্স অব অ্যাস্টুরিয়াস মনা (১৯৮৯)
·         অ্যান্ড্রু গেম্যান্ট মনা (১৯৯৮)
·         নেলর মনা (১৯৯৯)
·         লিলিয়েনফেল্ড মনা (১৯৯৯)
·         রয়্যাল সোসাইটি অব আর্টসকী আলবার্ট মেদেল (১৯৯৯)
·         কপলি মেদেল (২০০৬)
·         প্রেসিডেন্সিয়াল মেডেল অব ফ্রিডম (২০০৯)
·         ফান্ডামেন্টাল ফিজিক্স মনা (২০১২)
·         বিবিভিএ ফাউন্ডেশন ফ্রন্টিয়ারস অব নলেজ মনা (২০১৫)


লখিপুরওনলাইন গী ফেসবুক পেজ লাইক তৌবিউ।


Post a Comment

0 Comments