Lakhipuronline

Dealing with the issues...

February 15, 2018

গুৱাহাতি দিক্লারেসনগী ফাইনেল দ্রাফ্টতা য়েলহৌমী ওইনা মনিপুরীসু য়াওরে

১৮২৬ ফেব্রুৱারী ২৪ মমাংদগী খুন্দারক্লবশিং আসামগী য়েলহৌমীনি। ৱাফম অসি খিলঞ্জীয়া মঞ্চ(ইন্দিজিনাস পিপলস্ ফোরাম) অসামনা শিল্লাংদুনা ফেব্রুৱারী ১২দগী নুমিৎ নিনি চুপ্না গুৱাহাতিদা পাঙথোকখিবা অহানবা ইন্দিজিনাস কনভেন্সনদা গুৱাহাতি দিক্লারেসনগী খুৎথাংদা লাউথোকখিবনি। আসামগী তোঙান তোঙানবা ফুরূপ ৪৫ রোমনা শরুক য়াখিবা মীফমসিদা য়েলহৌমীগী ৱাহন্থোক করিনো অমসুং মখোয়গী মতমচুপ্পগী ওইনা ঙাকশেন্দুনা থম্লগদবা চৎন-পথাপ অমা শেম্বগী পান্দমদা মীফম অসি পাঙথোকখিবনি। মখোয়গী দেক্লারেসনদা মনিপুরী বুসু য়েলহৌমীনি হায়না হাপ্লগা য়েলহৌঙৈদগী লৈরক্লবনি হায়না পল্লমদবদু মনিপুরীশিংদি ইয়ান্দাবু ত্রিতিগী মমাংদগী আসামদা লৈরক্লবনি হায়বা ৱাফম খিলঞ্জীয়া মঞ্চনা খঙলবা মতুংদা হৌজিকতি গুৱাহাতি দিক্লারেসনগী ফাইনেল দ্রাফ্টতা মনিপুরীসু য়াওরে । দিক্লারেসন অদুদা পল্লিবা য়েলহৌমীনি হায়না শকখঙলবা অতৈ ফুরূপশিং অদুদি কছারী, বড়ো কছারী, রাভা, কার্বি, ডিমাসা, মিসিং, চুতীয়া, দেউরী, কোচ রাজবংশী, মরাণ, মটক, সোণোৱাল কছারী, ঠেঙাল কছারী, মেস কছারী, বর্মন কছারী, শরণীয়া কছারী, মদাহী, মেস, তাই আহোম, তাই খামতি, তাই ফাকে, চিংফৌ, তাই খাময়াং, তাই তুরুং, তাই আইটন, তাংছা, আপাতানি, নক্তে, কুকি, হাজোং, শালৈ , অসমীয়া কৈবর্ত নাথ, যোগী, কেওট, কলিতা, কায়স্থ, অসমীয়া ব্রাহ্মণ, গরিয়া, মরিয়া, দেশী, অসমীয়া শিখ অমসুং হৌজিক আসামগী ঙমখৈগী মনুংদা লৈরিবা অৱাং নোংপোক রাজ্যগী য়েলহৌমীশিং (নাগা, মিজো , মণিপুরী, নিচি, আদি, অকা, খাসিয়া, জয়ন্তীয়া, গারো) অসিনচিংবনি। 
ওল আসাম মনিপুরী স্টুদেন্টস্ ইউনিয়ন(আমসু),মনিপুরী য়ুথ ফ্রন্ট অসাম, মনিপুরী এসোসিয়েসন অফ নোর্থ ইস্ট ইন্দিয়া নচিংবগী মীহুৎ কাঙবুশিংনা থৌরম অদুদা শরুক য়াখিবগা লোয়ননা আসামদা খুন্দাদুনা লৈরিবা মনিপুরী খুদিংমক্কী মহুৎ শিন্না পাম্বোম ৱাংনা থাঙ্গত্তুনা লেপ্লম্বা মীহুৎশিংবু মাইগৈ কয়াদগী থাগৎনবা ফোঙদোক্লরক্লি। 
অসোমদা চাবাগানগী ফুরূপশিংবু য়েলহৌমীগী লিস্টতা য়াওহল্লোই হায়বা গুৱাহাতিদা পাঙথোকখিবা থৌরমদা খিলঞ্জীয়া মঞ্চ, অসমগী চীফ কনভেনর অনুপ চেতিয়াগী ৱাঙাংবু আসাম টি ট্রাইবস্ স্টুদেন্টস্ এসোসিয়েসন (আটসা) না কন্না য়ানিংদবা ফোংদোকখ্রবসু মখোয়শিংসিদি বৃটিসনা আসামদা লাকপা মতমদা চাবাগানগী থৌমী ওইনা শিজিন্ননবা ভারতকী অতৈ লমদমদগী লোয়নরকপনি হায়বসিমদি পুৱারীদা য়াওরবনি। অমরোমদা গুৱাহাতি দিক্লারেসনগী মতুং ইন্না ১৮২৬কী মমাংদগী লৈরক্লবা হায়বা তারবদি মতমদুদা বাংলাদেশকী সিলেট জিলাসিসু আসামগী মনুংচন্না লৈরম্বা মরম্না নুংনাংনিঙাই ওইবা ৱাফম কয়ামসু লৈতবদি নত্তে।

লখিপুরওনলাইন গী ফেসবুক পেজ লাইক তৌবিউ।

No comments:

Post a Comment

Comments ...